SOCAR İstiqrazlarının alan şəxslər onları harada və necə sata, bağışlaya və ya hədiyyə edə bilər? Bunun üçün necə bir sistem təşkil olunmuşdur?

İstiqraz sahibləri istiqrazlarını istədikləri vaxt sata və nağda çevirə bilərlər. SOCAR bunun üçün lazım olan bütün sistemi və texniki infrastrukturu qurub və hər zaman bazarda istiqrazlarının alıcısı kimi çıxış edərək, istiqraz sahiblərinin maliyyə itkisi ilə üzləşmələrinin qarşısını alır. SOCAR İstiqrazlarının sahibləri istiqrazlarını 1 və 5 saylı ASAN xidmət mərkəzlərində yaradılmış SOCAR İstiqrazı kiosklarına müraciət edərək sata bilərlər. Bütün hallarda SOCAR, buraxdığı istiqrazların likvidliyinə təminat verir. Qanunvericiliyin tələbləri çərçivəsində istiqraz sahibi notarius vasitəsi ilə sahib olduğu istiqrazları bağışlaya və ya hədiyyə edə bilər.

SOCAR İstiqrazları ildə nə qədər qazanc gətirir?

Əvvəlcədən elan olunduğu kimi, SOCAR İstiqrazlarının nominal qiyməti 1000 dollar, illik gəlirliliyi 4.5%-dir. Bu şərtlərə əsasən, 1 ədəd istiqrazı olanlar ildə 45 dollar, 10 ədəd istiqrazı olanlar ildə 450 dollar, 100 ədəd istiqrazı olanlar isə ildə 4 500 dollar gəlir əldə edəcəklər. Bu vəsaitlər ildə 4 dəfə bərabər hissələrlə istiqraz sahibinin bank hesabına köçürüləcək. Məsələn, şəxsin 10 istiqrazı varsa, o, ildə 450 dolar gəlir götürəcək və bu vəsaitlər hər 3 aydan bir 112.5 dollar olmaqla, ümumilikdə 4 bərabər hissə ilə onun hesabına köçürüləcək. İnvestor SOCAR İstiqrazlarından aldığı faizləri yenidən istiqrazlara investisiya edərək qazancını daha da artıra bilər.

İstiqraz almaq istəyən Azərbaycan şirkətindən hansı sənədlər tələb olunur?

Azərbaycan şirkəti SOCAR İstiqrazlarını yerli investisiya şirkətləri vasitəsilə əldə edə bilərlər. Bunun üçün investisiya xidmətlərinin göstərilməsi üzrə müqavilə bağlanılır və əsasən aşağıda tələb olunan sənədləri təqdim edirlər. Notarial təsdiq olunmuş nizamnamənin surəti, dövlət reyestrindən çıxarış, dövlət qeydiyyatı haqqında şəhadətnamə (VÖEN), imza səlahiyyətini təsdiqləyən sənədlər və sair.

İstiqraz almaq istəyən xarici şirkətdən hansı sənədlər tələb olunur?

Xarici hüquqi şəxs SOCAR İstiqrazlarını yerli investisiya şirkətləri vasitəsilə əldə edə bilərlər. Müvafiq müqavilənin bağlanılması üçün aşağıdakı sənədlər tələb oluna bilər: apostil və ya leqallaşdırma qaydasında təsdiq edilmiş surətləri: hüquqi şəxsin dövlət qeydiyyatından keçməsi barədə sənəd, vergi ödəyicisinin uçota alınması haqqında şəhadətnamə, nizamnaməsi, qanuni təmsilçisinin təyin olunması barədə və şəxsiyyətini təsdiq edən sənəd.

Bunlardan əlavə, digər məlumatlar və lazım olduqda, sənədlər də tələb oluna bilər (dollarda olan cari bank hesabı məlumatları, FATCA, faktiki ünvan, SMS bildiriş üçün mobil nömrə, email, fax, telefon nömrəsi, filial və nümayəndəlikləri, etibarnamə, hüquqi şəxsi digər şəxs təmsil etdikdə benefisiarın müəyyənləşdirilməsi üçün sənədlər, səhmdarları haqqında sənəd).

Təkrar bazardan alınan istiqrazların 5 illik müddəti qalır? Yəni investor 2021-də buraxılan istiqrazı 2023-də alırsa onda onun müddəti nə vaxt bitir?

SOCAR İstiqrazlarının müddəti 5 illik olduğu üçün, 2 ildən sonra təkrar bazarda istiqraz əldə etmiş şəxs üçün istiqrazın müddəti 3 il olacaqdır. Nə vaxt alınmasından asılı olmayaraq SOCAR İstiqrazlarının müddəti 2026-ci ildə başa çatır.